SECTOR

SECTOR

Asconio etstimator fuit ac redemptor bonorum damnati atque proscripti. Aestimabat nempe quanti essent, et redimebat ab his, qui sectionem vendebant, ut, quod pactum esset, illis redderet in pecunia, quod in rebus aut iure earum persequendarum accepit. Hinc in Festo, Sectio persequutio iuris: et, Sectores, qui bona sua persequuntur. Ad quem locum notat Scaliger, verbis illis non satis declarari quid sit Sector, neque ab auctore Glossarii, qui βιώνην interpretatur. Secus tamen videtur Salmasio in de Modo Usurar. p. 828. qui ab utroque recte id factum dicit, ut nihil melius: neque Sectio Graece melius, quam βιωνία reddi potest. Hi aliquando iidem cum Delatoribus seu Quadruplatoribus, qui mollius se Cognitores appellabant, fuêre, cum videl. hi, specie commodorum Aerarli vel Fisci, sua commoda curantes, non solum Praefectis subicerent obnoxios mulctis, aut debitores vel veteres vel latentes: sed et ipsi damnatorum dein subhastatorumque bona coemerent. Ex qua nota fuit Partus ille, exercendis idem apud Aerarium sectionibus samosus, et veterum Aerarii debitorum persecutor, apud Tacit. Annal. l. 13. c. 23. De iisdem pervagatus est Manilii locus, l. 5.

Non ullo careat digito, quaque iverit hasta,

Defueritque bonis Sector, praedamque lucretur

Noxius et patriam fraudarit debitor aeris.

Cognitor est Urbis. Nec non lascivit amores

In varios, ponitque forum, se datque Lyaeo.

Ad quae verba animadvertit Scaliger ritum licendi elatô digitô, in auctionibus, olim fuisse usitatum, quique bona hastae subiecta redempturi erant, eô sublatô professos esse, se esse Redemptores atque Sectores illorum. Litigabant hi saepe cum Cognitoribus aut Procuratoribus proscripti, contendentibus hoc vel illud ad sectionem non pertinere, quae aut creditoribus essent oppignorata aut dotis nomine obligata, vel quacumque alia de causa in bonis eius, cuius sectionem redemisent, non esse numeranda, sed inde detrahenda. Etiam non raro pessime multabantur, cum enim genus hoc hominum circa Praetoris hastam districtorum, invisum esset omnibus, hinc occasione datâ patiebantur sine cuiusquam misericordia, quae aliis fecerant. Unde elegantissime Seneca illorum lucrum vocat infame et quandoque suppuraturum, l. de Brev. vitae c. 11. ad quae verba Gronov. Nihil, inquit, frequentius, quam sub eodem Principe, nullâ mutatione rerum, nullô iudiciô infirmatô, Delatores et Sectores alienorum bonorum sua exempla passos, h. e. delatos, et sub hastam ivisse. Acervi exemplorum apud Tacitum. Vide eum de Pec. Vet. l. 4. c. 3. Apud A. Gellium l. 13. c. 24. vox praedae sive spoliorum, hostibus detractorum, redemptionem notat, namque et hîc suae Sectoribus, et quidem honestiores, partes erant. Sic Caesar de bello Gall. l. 3. c. 33. Postridie eius diei, refractis portis, cum iam defenderet nemo, atque intromisis militibus nostris, sectionem eius oppidi universam Caesar vendidit. Ab his, qui emerant, capitum numerus relatus est millium quinquaginta tria. Ubi oppidi sectionem habes. Vide Anton. Thysium Ictum Notis in A. Gellium l. 13. c. cit. Hactenus ergo vox Sector, a sequendo vel persequendo: a secando vero, apud Plautum est in Trinummo, Actu 4. sc. 2. v. 20. ubi Zonarios Sectores appellavit, quos Aristophanes Comicus βαλαντιοτόμους, i. c. Crumenisecas, vocat. Zona enim cingulum quidem erat, interim sive quod latiore in latere dextero Zonâ uterentur, cui assuta et claviculis affixa erat scortea crumena, factum est, ut Zona pro crumena fuerit usurpata. Vide Ioh. Lautentium Ictum, Notis in Phaedrum l. 4. fab.21. v. 11.

Hi Zonas, illi res pretiosas colligunt.